શિવના નટરાજ સ્વરૂપનો મહિમા

મહાશિવરાત્રિ આપણા તમામ ધાર્મિક પર્વોમાં અનોખા પ્રકારનું પર્વ છે.

- વિદુર

મહાશિવરાત્રિ આપણા તમામ ધાર્મિક પર્વોમાં અનોખા પ્રકારનું પર્વ છે. ભગવાન શિવ અજન્મા ગણાય છે. તેમણે કોઈ જન્મ ધારણ કર્યો નથી અને છતાં બ્રહ્માંડમાં સર્વત્ર શિવ તત્ત્વ વ્યાપ્ત છે. મહાશિવરાત્રિ એ ભગવાન શિવશંકરનાં લગ્નનો દિવસ છે. શિવમહાપુરાણમાં શિવજીના ચોવીસ અવતારોનું વર્ણન છે. આ અવતારો એટલે શિવજીનાં જુદાં જુદાં સ્વરૂપો. તેમાંનો એક અવતાર છે સુનટ નર્તક. શિવે આ અવતાર કેમ ધારણ કર્યો એ વિશે એવું કહેવાય છે કે પાર્વતી શિવ સાથે લગ્નની ઇચ્છાથી તપસ્યા કરી રહ્યા હતા. શિવજી જે એક વખત સતી પ્રસંગમાં (દક્ષયજ્ઞમાં સતી વિધ્વંસ)ને કારણે ગૃહસ્થીથી વિમુખ બની ગયા હતા, પરંતુ એક અસુર નામે તા૨ક તેને શિવપુત્રના હાથે મરવાનું વરદાન મળ્યું હતું. એટલે જો શિવ લગ્ન ન કરે તો આ વરદાન સ્વયં તેને અમર બનાવી દે. દેવતાઓના આગ્રહથી શિવ પાર્વતીને દર્શન આપવા માટે રાજી થયા. તેનું કારણ શિવના પ્રથમ લગ્ન દરમિયાન પિતા દક્ષની ઇચ્છા વિરુદ્ધ તેમણે કરેલાં લગ્ન અને તેનું જે પરિણામ આવેલું, જેમાં સતીને ભસ્મ થવું પડેલું તે હતું. એટલે શિવ પ્રથમ પાર્વતીના પિતા હિમાલયને સંતુષ્ટ કરવા ઇચ્છતા હતા.